عيد الميلاد- بشري ود البطانة

انا من زمناً خدو مشالخ وهي من ازماناً خدها سادة


اتعجبت سماح مواتر


طبقات عالية وكلعا سادة


كانت بينا فوارق شاسعة


اتعارفنا وكانت جادة


وقالت عيد ميلادي الشهر الجاي ولازم تحضر


قلته ل خير


قلته ل خيييير


ودخل في اضافري وبتقصد ايه بعيد ميلادي


ايا ربي اتولدت يادابه


ابق الاعياد سوها زيادة


ايمكن ولدت وانا ما عارف


وايمكن ميلاد عيسي واجداده


ايا ربي بدقو الدلوكة


وبعزمو الحلال كالعادة ...


بس قلته ل خير وانا جاييكم .. وعديلة وزين


والشهر الجاي ...


مرق مركوبي من السحارة داقاهو المطرة قبل شهرين


ونكت طاقيتي من العضادة سليت لي سمات رقعتها زين


سديريتي وابوي مسويها لبد فرتقته اللبده مرقتها طين


عراقي مغزوز في الكوكار كان سوها وقاية وقت فازعين


سروال مدفوس في رحل العيش ملفوف محشور بين شوالين


لميتن واديتن شطفه .. وشريتن فوق لزريبة الزين


والزين بقراته مكوفرات تبّ مضغن طاقيتي هرنها زين


شافت السرة بت الهرام ...


طردتن وجابتلي النتاف


وغضبته غضب ...


وعزمتا اقوم جفن ما جفن اقوم في الحين


مرقته ووشي مطوطو تبّ ..


وصتني الحلة رجال وعوين ..


وصتني أم نوفل لكركار وكان تلقي ودك جيب لي رطلين


وقروشك حلف صرة وبالحين


وصتني حليمة بت العجبين سروال لمحمد ورطلين بن


بنبيع لنا شاه ونديك


بعدين ...


والناس بتوصي وغبيانه والناس غبيانه وبتوصي


وانا ظرفي مكدر ي الطين ..


بتوصي انا ذي بايع لي بعير ..


وانا بايع ..


تيسي وعيش كيلتين


والتيس اعور ما جاب لي سعر


والعيش بتاب ومسوس وشين


تتسود خطوة ها السفرة انا ماش لواجب اقوم بالدين


وركبت البص مخلايتي دفس


كدوسي وحقه وعود سكين


وانا راكب في البص بتامل ...


يا ربي بجييبو الحكامات


بسوي الدلوكه بجو الحلال


يار بي بعزم الرقاصات


ضابحين تيران أم خرفان صرّ


بتدقق كمين شوالات


وانا مالي ومال عيد ميلاد ..


كان نزلو الدلوكه اولادن


انا بنزل حدي معقب


وبتدرق اصقر في التالات


وامسك صوتي المدهون قطران ..


واركز .. واندق ..


شان السمحات ما يقولن ضيفنا قريدن ساي


وانا زول معروف خراب حفلات


ووصلت وسأل لمن جيتون وهداك الحوش


مزرود لحلقو بنات سمحات


شايلات هدايات وحدات وردات وحدات زهرات


شايلات رسمات في شكل ارنوب وحدات كدوس واسود ونمور


سبحان الله ذي الميتات ...


وانا جيت بيدي ما عارف شئ


شايلي الفين داير اكتبن في الدفتر جتّ


وانا زول واجبات ...


والناس ملخومة ومربوشه


اتضاحكو قرّ حايشين صينية تبق شمعات


وما في زول قال لي انت منو ؟؟؟!!!


ما بعرفو الضيف ذي الخواجات


وانا كت راجي الدلوكة تدق ..


لكن اللوم بجي بالهفوات


لتيت عكازي وقفت طرف ..


ملص نعلاتي اتفرشخته


لي تفه اخلاقي مضنقلو تبّ


تنباكي وحقتي مزروده ولعته كدوسي واخت جبدات


وانا بتأمل في هذا العالم ..


ياتو البنوت .. وياتو الجنيات ..


والاروع في هذي الزيطه ما عرف اصلا زولتي الجيته


بحّرت عيني لامن برقن


كل البنوت زيها سمحات ..


والبقر اتشابه لي ضمه ما عرفته الفاتت والجايات


لحن الحظ هي النقرتني .. ما شاله الشك من شافتني


شاقتني وقامت بالواجب .. هي اصيلة وطيبة وست حوبات


نادت صحباته بنتعارف ..


نانسي و ننادي و عفرا و حورا و ليميا و شيما وكفا ...


من وين ؟؟


من لندن جينا امس راجعين باكر ذي ها اللحظات


من الطايف والمنشيه ومدينة النيل وبلود راقيات ..


طيبات طيبة وكل كليمة معاها ضحيكه ..


ونضاف .. ورهاف ذي اللعبات


واحدتن فيهن سمحة سماح ..


لكن مي طاعمة !!!


انا زول مستغرب في حاجات ..


انا زول اسراني سماحةً قاسية ..


بت البلد الثابته وراسية ..


سماحة التايه .. الماهو ملفق وما مزين بكريمات


وهسع هن نهشني اتسألن ..


عرف نفسك بعبارات ..


ات ياتك من يات كوكب ..


من يات ساده واستايلك ذاتو خرب للعادة


قلت ليهن ..


انا الاسد الحرس غابتو الضريه


وانا الساعة الكتال بخطف حديه


انا التارك عدوي طابقلو.. كيه


وانا الزايرني ما بجيب لي هديه


ساكن ..


مفسح أم هبج السخية ..


مرتع الالبل الضان السعيه


مهندي مجالس الدرج الجديه ..


وادرج عاطلة الرقد السخية ...